Ной, ооң өг-бүлези болгаш дириг амытаннар бажың-хемеже кире берген. Иегова оларның эжиин хааптарга, чаъс чаап эгелээн. Суг көдүрлүрге, бажың-хеме салдап чорупкан. Оон суг бүдүн черни шыва апкан. Бажың-хемеже кирбээн улус өлүп калган. А Ной өг-бүлези-биле дириг арткан. Сагыштаалап көр даан, Иеговага дыңнангыр болганы дээш, олар кайы хире өөрүп турган-дыр?

Чаъс 40 дүн-хүн ишти чаггаш, оон соксаан. Суг чоорту сыыгап эгелээн. Ам-на бажың-хеме даглар кырынга турупкан. Ной өг-бүлези-биле үнер дээрге, суг ам-даа бар болган.

Ной өг-бүлези-биле бажың-хемеге бир чыл ажыг олурган соонда, суг бичиилеп соглуп калган. Оон Иегова оларга үнүп болурун айыткан. Олар чаа делегейде келген ышкаш болган! Ол сес кижи дириг артканы дээш, Иеговага өөрүп четтирип, аңаа өргүл берген.

Иегова ол өргүлге аажок таарзынган. Ол черде бүгү амылыг чүвени моон соңгаар үер-биле узуткавазын аазаан. Аазаашкынын бадыткаар дээш, ол дээрге бир дугаар челээшти көргүскен. Сен кажан-бир челээшти көрген сен бе?

Оон Иегова Нойнуң өг-бүлезинге ажы-төлдүг болуп, черни долдурар даалга берген.