YOOSOMA 6
Atthu 8 Yaahoopowa Khukela Elapo Yooreera
Nowe, emusi awe ni axinama yaahikela mukalawani. Yehova aahiwala mukhora, nto epula yaahipacerya orupa. Yaahirupa epula yinceene nto ekalawa yaahipacerya weetta vasulu va maasi. Nto maasi awo yaahisareya elapo yotheene. Atthu otheene ootakhala yaari vate va ekalawa yaahikhwa. Masi Nowe ni emusi awe yaahoopowa mukalawani. Nkahaya muupuwele moota awo yaahakalanle aya mwaha wa omwiiwelela Yehova!
Nuumala epula ele orupa mahiku 40 ohiyu ni othana, yaahimaala. Nto vakhaani-vakhaani maasi yaahipacerya owelela. Nuumala-vo, ekalawa yaaheemela vasulu va mwaako. Okhala wira maasi nlelo yaahikhuneela elapo yotheene, nto Nowe ni emusi awe yaahaana ovikaniha okhala mukalawani.
Vakhaani-vakhaani, maasi yaahipacerya owelela. Nowe ni emusi awe yaahikhala mukalawani-mme ovikana eyaakha emosa. Nto Yehova aahaaleela wira ekhumele ota wa ekalawa maana atthu otheene ootakhala yaahikhwa, vano elapo yaari yooreera. Awo yaahimuxukhurela vanceene Yehova maana aahiwoopola. Nto yaahooniherya oxukhurela envahaka mukuttho.
Yehova aahisiveliwa ni yoovaha eyo. Owo aahileiherya wira khaarowa-tho oruuha epula ya mutaaseke wira ohonone itthu sotheene mulaponi. Ntoko ethoonyeryo ya yooleiherya awe, Muluku aahikumiherya musulu ekhweyi yoopacerya. Niireke nyuwo mootoko oweha ekhweyi?
Nuumala-vo, Yehova aahimuleela Nowe ni emusi awe wira yaayareke anamwane ni esareyeke mulaponi.
‘Nowé ahikela mukalawani. [Nto atthu] khiyànyiherya etthu [wala ocalela], mpakha ophiya epula ya mutáseke, khuwivakasa atthu othene’.—Matheyo 24:38, 39
You May Also Like
MUTAKIHEKE WAAMINI WAYA
Nowe “Ètta Ephiro ya Muluku” Eekeekhai”
Muxankiho xeeni Nowe ni amwaarawe yaarina aya voohimya sa waahuwa anaaya? Moota xeeni awo yoonihenrye aya okhala oororomeleya okathi yaateka aya ekalawa?
