Hi Noe, an iya pamilya, ngan an mga hayop sinulod ha arka. Iginsara ni Jehova an purtahan hito, ngan nagtikang umuran. Bumunok gud salit nagtikang lumutaw an arka. Katapos, an bug-os nga tuna napuno hin katubigan. Ha gawas han arka, namatay an tanan nga magraot nga tawo. Pero ha sulod, talwas hi Noe ngan an iya pamilya. Nahuhunahuna mo ba an ira kalipay tungod han ira pagsugot kan Jehova?

Nag-inuran ha sulod hin 40 ka adlaw ngan 40 ka gab-i, tapos umundang ito. Hinay-hinay nga humubas an tubig, ngan an arka sinanglad ha kabukiran. Pero tubigon pa an palibot, salit diri pa makakagawas ha arka hi Noe ngan an iya pamilya.

Hinay-hinay nga nagmara an tuna. Sobra usa ka tuig hi Noe ngan an iya pamilya ha sulod han arka. Tapos, ginsidngan hira ni Jehova nga puydi na hira gumawas, ngadto ha sugad hin bag-o nga kalibotan. Mapasalamaton gud hira nga gintalwas hira ni Jehova salit naghalad hira ha iya.

Nalipay hi Jehova ha ira halad. Nagsaad hiya nga diri na gud niya bubungkagon an ngatanan dinhi ha tuna pinaagi hin baha. Sugad nga tigaman hito nga saad, ginpahinabo ni Jehova nga makita ha langit ha siyahan nga higayon an usa nga balangaw. Nakakita ka na ba hin balangaw?

Katapos, ginsugo ni Jehova hi Noe ngan an iya pamilya nga magkaada mga anak ngan pun-on an tuna.