Nowa, liŵasa lyakwe, nambosoni yinyama yajinjile m’combo. Yehofa ŵawugele pamlango kaneko wula jatandite kugwa. Wulajo jagwile mnope mwati comboco catandite kujajaŵala. Mwangajembeceya, cilambo cosope cagumbele ni mesi. Ŵandu wosope ŵakusakala ŵaŵaliji pasa pacomboco ŵawile. Nambo Nowa ni liŵasa lyakwe ŵaliji ŵakuteyeka mkati mwa combo. Mgambe ganisya mwaŵapikanile mumtima mwawo ligongo lyakumpikanila Yehofa!

Wulajo jagwile kwa masiku 40 musi ni cilo. Mwapanandipanandi, mesi gatandite kupwa. Kaneko, comboco cajimi petumbi. Nambope, mesigo galiji ciŵela palipose mwamti Nowa ni liŵasa lyakwe nganakopoka citema m’combomo.

Mwapanandipanandi, mesigo gatandite kumulila. Nowa ni liŵasa lyakwelyo ŵatemi m’comboco kupunda caka camtundu. Kaneko Yehofa ŵasalile kuti akopoce m’combomo. Pasa pawonekaga mpela cilambo casambano. Jemanjajo ŵaliji ŵakusangalala mnope ligongo lyakuti Yehofa ŵakulupwisye, ni ŵalosisye kuyamicila mwakupeleka mbopesi kwa Yehofa.

Yehofa ŵasangalele mnope ni mbopesijo. Ŵatesile cilanga cakuti ngasajonangasoni cilambo ni cigumula ca mesi. Mpela cimanyisyo ca cilangaci, ŵatesile ukunje wa wula wandanda kuti wuwoneceleje kwinani. Ana pakwete pim’wuweni ukunje wa wula?

Kaneko Yehofa ŵamsalile Nowa ni liŵasa lyakwe kuti aŵeleceje ŵanace ni gumbala cilambo capasi.