Noé, u láakʼtsiloʼob yéetel le baʼalcheʼoboʼ ookoʼob ichil le arcaoʼ. Jéeoba túuneʼ tu kʼalaj u joonajileʼ ka káaj u kʼáaxal leʼ jaʼoʼ. Sen kʼaʼamchaj le jaʼoʼ, le oʼolal tu chʼúuyaj le arcaoʼ, ka joʼopʼ u bin yóokʼol le jaʼoʼ. Jujunpʼíitil úuchik u láaj búulul le Luʼumoʼ. Le kʼasaʼan máakoʼob maʼ ookoʼob ichil le arcaoʼ láaj kíimoʼob. Chéen baʼaleʼ Noé yéetel u láakʼtsiloʼobeʼ tu salvartubaʼob tumen ookoʼob ichil le arcaoʼ. ¿Ka máansik wa ta tuukul bukaʼaj úuchik u kiʼimaktal u yóoloʼob ikil tu yuʼubiloʼob u tʼaan Jéeoba?

Sen kʼáax jaʼ ich 40 kʼiinoʼob yéetel 40 áakʼaboʼob, ka tsʼoʼokeʼ xuʼuli. Jeʼex máanik le kʼiinoʼoboʼ bey binik u saʼapʼal le jaʼoʼ. Ka tsʼoʼokeʼ le arcaoʼ etsʼlaj yóokʼol junpʼéel puʼuk. Baʼaleʼ tumen maʼ láaj saʼapʼak le jaʼoʼ, Noé yéetel u láakʼtsiloʼobeʼ maʼ páajchaj u jáan jóokʼloʼob teʼ arcaoʼ.

Ka máan kʼiineʼ láaj saʼapʼ le jaʼoʼ. Maas tiʼ junpʼéel año tu máansaj Noé yéetel u láakʼtsiloʼob ichil le arcaoʼ. Ka tsʼoʼokeʼ aʼalaʼabtiʼob tumen Jéeoba jeʼel u páajtal u jóokʼloʼobeʼ. Ka jóokʼoʼobeʼ mix juntúul máak kʼasaʼan tu yiloʼob. Letiʼobeʼ jach kiʼimakchaj u yóoloʼob tumen salvartaʼaboʼob tumen Jéeoba. Le oʼolal tu tsʼáajoʼobtiʼ junpʼéel siibal.

Jéeobaeʼ jatsʼuts tu yilil le baʼax siʼib tiʼoʼ, le oʼolal tu yaʼalaj mix bikʼin ken u kaʼa beet u búulul yóokʼol kaab utiaʼal kíimsik le máakoʼoboʼ. Utiaʼal u kʼaʼajsik le baʼax tu yaʼaloʼ tu beetaj u jóokʼol le yáax arco iris teʼ kaʼanoʼ. ¿Tsʼoʼok wa a wilik junpʼéel arco iris?

Jéeoba xaneʼ tu yaʼalaj ka yanak u paalaloʼob utiaʼal u chupikoʼob le Luʼumaʼ.