Noé né xfamily né nimal goyoʼyibu lainy arca. Jehová bisieg xpuertni, né gosaló góc guié. Nigolú góc guié pór ngú arcacu gosaló bisobló ló nís. Conforma godudy dzú ló guidopy Gudxlio biguaguel nís. Guirá buñ mal ni diti goyoʼ lainy arca goity. Per Noé né xfamily bilaa. ¿Ritzanló ló xpensarylo balaati goyoʼ nakityibu por ni bisobyibu Jehová la?

Gosagaʼ guié 40 dzú né 40 goxin né ór cú golésni. Godudy dzú gosaló biaʼach ló nís. Después arcacu biaʼanni laidy toib dainy. Noé né xfamily diti nimaca bireʼyibu lainy arca portín gocla par nabich nís ló Gudxlio.

Noé né xfamily goyoʼ lainy arca más de tobiz. Conforma godudy dzú dxoga dxoga biaʼach ló nís. Ór cú Jehová góoch layibu que ma labúu nareʼyibu lainy arca, né nabanyibu ló toib lagary ro yadi buñ mal. Nigolú bibaladxbu portín bilaa Jehová layibu. Par naduidyibu guixquix Jehová bunyibu toib galrrascad.

Jehová bioladx galrrascadcu, né biduidybu xtiitzbu que dipa saquiimbu guié par guinitlóbu guirá ni noʼ ló Gudxlio xomod bunybu dzúcu. Par diti ñaladx buñ xtiitzbu, bunybu que nareʼ toib arcoíris lainy guibá. ¿Ma bibiʼlo láani toibtica buelt la?

Jehová láaca gochbu Noé né xfamily Noé ñoʼ xiinyibu né nadalyibu ló Gudxlio.