I nge Pii Aluka, lutino pa Nua ki mongi gunywalo lutino mapol. Jo me odigi gunya mapol ata, ci gucako ket i but lobo mapat pat kit ma Jehovah ociko ni gutim.

Ento jo me odi mukene pe gubedo luwiny bot Jehovah. Gin guwacci: ‘Wek wageru gangwa wabed kany. Wageru ot mabor adada ma wiye bigudo wa polo. Ci nyingwa biywek.’

 Jehovah onongo cwinye pe yom pi gin ma jo magi gitye ka timone, pi man en ojukogi woko. Tika ingeyo gin ma en otimo? Oweko gucako loko leb mapat pat atura. Kit macalo dano acel acel onongo pe ngeyo leb ma lawote loko, gugiko tic woko. Boma ma onongo gitye ka gero-ni gilwongo ni Babel, ma te lokke gonye ni “Anyobanyoba.” Dano gucako dak woko ki kenyu ci guket i wi lobo ducu. Ento gumedde ki timo jami maraco i kabedo manyen ma gucito iye. Tika onongo pud tye jo mogo ma gimaro Jehovah? Wabineno meno i dul ma lubo man.