Pagkatapos kan Baha, an mga aki ni Noe saka an mga agom kaini nagkaigwa nin dakul na aki. Nagdakula an pamilya ninda, asin nag-iristar sa iba-ibang parte kan daga, arog kan sinabi ni Jehova na gibuhon ninda.

Pero may mga pamilya na dai nagsunod ki Jehova. Sinabi ninda: ‘Maggibo kita nin siyudad asin dai na kita maghali digdi. Gumibo kita nin halangkawon na tore, tapos paabuton ta sa langit an tuktok kaiyan. Magigin sikat kita.’

 Dai naugma si Jehova sa ginigibo kan mga tawong idto, kaya nagdesisyon siyang papunduhon sinda. Aram mo kun ano an ginibo niya? Bigla niya sindang pinataram nin iba-ibang lengguwahe. Dahil dai na sinda nagkakairintindihan, nagpundo na sana sinda sa pagtugdok. An siyudad na piggigibo ninda inapod na Babel, na an buot sabihon, “Pagkaribong.” Nagsuruwayan an mga tawo asin nag-istar sa iba-ibang parte kan daga. Pero padagos pa man giraray sindang naggigibo nin maraot sa mga lugar na inistaran ninda. Igwa pa daw nin mga tawong namumutan pa man giraray si Jehova? Maaaraman ta sa sunod na istorya.