Süchikijee tü juya miyoʼushaatakat, awainmalaashii nüchonnii Noé otta na nüikeyuukana. Awainmalaashii maʼin na wayuukana sainküin tü Mmakat maʼaka nüküjatüjülüin shia Jeʼwaa.

Akanasaʼa eejanain waneinnua wayuu macheʼekana sümüin nünüiki Jeʼwaa. «Jooʼuya wakumajaiwa wapüla wanee pueulo miyoʼushaata. Wakumajeerü wanee aliikajaalee chaa sutuʼupaʼamüin tü sirumakat. Sükajee tia, kojuteena waya sutuma wayuu süpüshuaʼa», müshii naya.

 Mojusü nümüin Jeʼwaa tü naainjakat naya wayuukana, makalaka nuuʼuleʼerüin naya suulia tia. ¿Pütüjaa aaʼu kasain naainjain Jeʼwaa? Katataawasü nutuma sukuwaʼipa nanüiki naya wayuukana. Süka nnojoluitpain nayaawatüin saaʼu nanüiki na waneinnua, ooʼulaashii suulia akumajaa tia piichikat. Babel münüsü tia pueulo nakumajakat, süka katataawain nutuma Jeʼwaa sukuwaʼipa nanüiki na wayuukana chayaa. Naʼwalakajaaka na wayuukana sünain kepiaa sainküinpünaa tü Mmakat. Akanasaʼa ayatüinya naya sünain aainjaa kasa mojusü. ¿Eejaiche wanee wayuu aika apüla Jeʼwaa soʼu tia? ¿Jamüsüjaʼa saaʼin pümüin? Wekirajaajeerü anain tia suluʼu tü wane ekirajaayakat.