Kombunda yOmupupo, ovanatje vaNoa ovazandu novakazendu vawo va panduka ovanatje ovengi. Omaṱunḓu wawo ye kura, nu aye takavara mouparanga wehi, otja Jehova tje ve raera okutjita.

Nungwari omaṱunḓu tjiva kaya ri nonḓuviro ku Jehova. Owo va tja: ‘Indjeye tu ritungire otjihuro tu ture mu tjo. Ngatu tunge otjiretundu otjire tjohonga ndji mai vaza keyuru. Okuzambo tu ritjitire ena enene.’

 Jehova kari nohange noviṋa ovandu mbo mbyaave tjiti, okutja Eye wa toora omukambo wokuvetjaera. Ove mo tjiwa kutja Eye wa tjita vi? Eye wa tjita kutja ovandu mbo ve hungire omaraka pekepeke. Mena rokuhina okuzuvasana, owo va isa okutunga otjiretundu. Otjihuro tjaave tungu tja rukwa Babel, tji tji heya “Ombambaukire.” Ovandu nambano va uta okutjinda okuzamo mu Babel nave katura mouparanga wehi. Posiya owo va kayenda komurungu okutjita ouvi koṋa ku va katura. Nu hapo pari tjiva mba suverere Jehova? Matu kamuna mekondwa ndi mari kongorere ko.