Hka Sha-u Ing ngut ai hpang, Noa a kasha ni hte shanhte a madu jan ni hta kasha law law lu wa ai. Shanhte a dinghku gaw kaba wa ai. Yehowa shanhte hpe tsun da ai hte maren, shanhte gaw mungkan ntsa hta chyam bra mat wa ai.

Raitim, dinghku masha nkau mi gaw Yehowa a ga n madat ma ai. Shanhte ndai hku tsun ai: ‘Mare gaw de nna arau nga ga. Grai tsaw nna lamu dep ai wahpang gawgap ga. Rai yang, anhte amying kaba na re.’

 Yehowa gaw shanhte dai hku galaw ai hpe n ra ai. Dai majaw, shanhte galaw nga ai bungli hkring mat hkra galaw na ngu dawdan kau ai. Shi hpa galaw wa ai hpe chye ai kun? Shi gaw ga amyu myu tsun mat hkra kalang ta galaw dat ai. Dai majaw, shanhte langai hte langai tsun ai ga n chye na mat ai. Gawgap ai bungli mung hkring mat ai. Shanhte gawgap ai mare gaw Babela nga nna amying lu wa ai. Babela ngu ai gaw “Shanut Mat Ai” lachyum re. Dai hpang, masha ni gaw kaga shara de htawt sa nna mungkan ting hta nga mat wa ai. Raitim, shanhte gaw shanhte nga ai shara nnan hta n hkru ai amu ni matut galaw ma ai. Yehowa hpe tsawra ai masha ni naw nga na kun? Hpang na daw hta chye lu na re.