Dipôs di Dilúviu, fidjus di Nué i ses mudjer ten txeu fidju. Ses família fika grandi i es kumesa ta spadja pa tudu párti di Téra sima Jeová flaba es.

Má alguns di kes família ka obi ku Jeová. Es fla: ‘Nu ben faze un sidadi i nu ta fika li. Nu ta ben faze uma tori altu ki ta txiga séu. Tudu algen ta bira ta konxe-nu.’

Jeová ka fika kontenti ku kuza ki es staba ta  faze. Nton el disidi pô-s para. Bu sabe modi ki el faze kel-li? Dirapenti el pô-s ta pâpia un monti língua diferenti. Dja ki es ka ta ntendeba kunpanheru, es para di faze kel trabadju. Kel sidadi ki es staba ta faze fika ta txomadu di Babel, ki siginifika “Konfuzon”. Pesoas kumesa ta sai di la i ta bai mora na tudu párti di Téra. Má es kontínua ta faze kuzas mariadu na kes lugar ki es bai. Má, tinha algun algen ki inda ta amaba Jeová? Nu ben odja na kel otu kapítlu.