Na nima ya Mvula ya Ngolo, bana ya Noa ti bankento na bo butaka bana mingi. Mabuta na bo kumaka nene, mpi bo yantikaka kupanzana na bandambu ya kuswaswana ya ntoto, mutindu Yehowa songaka bo.

Kansi, mabuta ya nkaka vandaka kulemfuka ve na Yehowa. Bo tubaka nde: ‘Beto tunga mbanza mpi beto bikala awa. Beto ta sala nzo-zulu ya nda kibeni yina ta kuma tii na zulu. Ebuna beto ta zabana mingi.’

 Yehowa sepelaka ve na mambu yina bantu yina vandaka kusala, yo yina yandi bakaka lukanu ya kusukisa bo. Keti nge me zaba mutindu yandi salaka yo? Na mbala mosi, yandi salaka nde bo yantika kutuba bandinga ya kuswaswana. Sambu bo lendaka kubakisa ve mambu yina bankaka ke tuba, bo yambulaka kutunga. Mbanza yina bo vandaka kutunga zabanaka na zina ya Babele, yina ke tendula “Mavwanga.” Bantu yantikaka kukwenda mpi kuzinga bisika yonso na ntoto. Kansi, bo landaka kusala mambu ya mbi na bisika ya mpa yina bo vandaka kuzinga. Keti yo vandaka ti bantu yina vandaka kuzola Yehowa? Beto ta mona yo na kapu yina ke landa.