Thutha wa Mũiyũro, ariũ a Nuhu o hamwe na atumia ao nĩ maagĩire na ciana nyingĩ. Famĩlĩ ciao nĩ cianenehire na igĩtherema mũno thĩinĩ wa thĩ, o ta ũrĩa Jehova aamerĩte meke.

No andũ a famĩlĩ imwe maatiathĩkagĩra Jehova. Moigire ũũ: ‘Rekei twake itũũra tũikarage gũkũ. Tũgwaka nyũmba ndaihu na igũrũ nginya ĩkinye matu-inĩ, nĩguo tũgĩe igweta.’

 Jehova ndaakenire nĩ ũrĩa andũ acio meekaga, na kwoguo agĩtua itua rĩa kũrũgamia mwako ũcio. Hihi nĩ ũĩ eekire ũguo atĩa? Aahĩngĩcanirie thiomi ciao o rĩmwe. Tondũ rĩu matingĩahotire kũiguana rĩngĩ, no gũtiga maatigire gwaka. Nyũmba ĩyo maakaga yetirũo Babeli, rĩĩtwa rĩrĩa riugĩte “Kũhĩngĩcanio.” Andũ nĩ maambĩrĩirie gũthamĩra mĩena ĩtiganĩte thĩinĩ wa thĩ nĩguo magatũũre kuo. Ĩndĩ maathiire o na mbere gwĩka maũndũ moru kũrĩa maathamĩire. No hihi nĩ kwarĩ na andũ meendete Jehova? Nĩ tũkuona thĩinĩ wa gĩcunjĩ kĩrĩa kĩrũmĩrĩire.