មេរៀនទី៧
ប៉មបាបិល
ក្រោយពីទឹកជំនន់ កូនប្រុសៗរបស់ណូអេនិងកូនប្រសាគាត់ មានកូនជាច្រើន។ ក្រុមគ្រួសាររបស់ពួកគេមានគ្នាកាន់តែច្រើនឡើងៗ ដូច្នេះកូនចៅពួកគេក៏បានរីកសុសសាយ ទៅរស់នៅកន្លែងផ្សេងៗនៅផែនដី ដូចព្រះយេហូវ៉ាបានបង្គាប់ពួកគេ។
ប៉ុន្តែ កូនចៅខ្លះមិនបានស្ដាប់បង្គាប់ព្រះយេហូវ៉ាទេ។ ពួកគេនិយាយគ្នាថា៖ ‹ចូរយើងសង់ក្រុងមួយ ហើយរស់នៅទីនេះ។ យើងនឹងសង់ប៉មដែលមានកម្ពស់ខ្ពស់ដល់មេឃ។ រួចយើងនឹងមានកេរ្តិ៍ឈ្មោះល្បីល្បាញ›។
ព្រះយេហូវ៉ាមិនពេញចិត្តនឹងអ្វីដែលពួកគេកំពុងធ្វើទេ។ ហេតុនេះ លោកសម្រេចចិត្តបញ្ឈប់ការសាងសង់របស់ពួកគេ។ តើអ្នកដឹងទេថា លោកធ្វើដូច្នេះដោយរបៀបណា? ភ្លាមៗនោះ លោកបានធ្វើឲ្យពួកគេនិយាយភាសាផ្សេងពីគ្នា។ ពេលពួកគេនិយាយមិនយល់ភាសាគ្នា ពួកគេក៏ឈប់សាងសង់។ ក្រោយមក ក្រុងនោះមានឈ្មោះថាបាបិល មានន័យថា«ការបំភាន់»។ មនុស្សចាប់ផ្ដើមបែកខ្ញែកគ្នា ទៅរស់នៅកន្លែងផ្សេងៗពេញផែនដី។ ប៉ុន្តែ សូម្បីតែពួកគេរស់នៅកន្លែងថ្មី ក៏ពួកគេនៅតែបន្តធ្វើអំពើអាក្រក់ដែរ។ ដូច្នេះ តើនៅមានអ្នកដែលស្រឡាញ់ព្រះយេហូវ៉ាទេ? សូមយើងរកចម្លើយនៅមេរៀនបន្ទាប់។
«អ្នកណាដែលតម្កើងខ្លួន អ្នកនោះនឹងត្រូវបន្ទាបចុះ តែអ្នកណាដែលបន្ទាបខ្លួន អ្នកនោះនឹងត្រូវតម្កើងឡើង»។—លូកា ១៨:១៤
លោកអ្នកក៏ប្រហែលជាចូលចិត្តដែរ
ទស្សនាវដ្ដី
តើភាសាទាំងអស់មានដើមកំណើតមកពី«ប៉មបាបិល»ឬ?
តើប៉មបាបិលជាអ្វី? តាមពិត តើភាសាផ្សេងៗរបស់មនុស្សជាតិមានដើមកំណើតមកពីណា?
