Muyulo byo apwile, baana ba kwa Nowa ne bakazhi babo basemene baana bavula. Bisemi byabo byatendekele kuvula bingi, kabiji batendekele kusalañena mwaya ntanda, byonkatu Yehoba byo ebabuujile.

Pano bino, bisemi bimo kechi byakookejile Yehoba ne. Baambile’mba: ‘Twayai tushimike muzhi ne kwikalamo. Tushimike ne kyamba kyalepa kyafika mwiulu. Kabiji tukatumbalala bingi.’

 Yehoba kechi watemenwe byaubilenga bano bantu ne. Onkao mambo, wafuukwilepo kwibakanya byo baubilenga. Wayuka byo aubile nyi? Wibalengejile kutendeka kwamba milaka yapusana pusana. Onkao mambo, bakankelwe kumvwañana. Kino kibalengejile kuleka kushimika uno muzhi. Uno muzhi ye bashimikilenga batendekele kumutela’mba Babela, kilumbulula’mba “Kuvulañanya.” Bantu batendekele kufuma mu uno muzhi ne kuya na kwiikela mu mapunzha apusana pusana. Pano bino, batwajijile na kuba bintu byatama mu mapunzha mo baikelenga. Nanchi kwajingapo bamo baubilenga byawama nyi? Tusakumona mu kitango kyalondelapo.