Afta di Ebi Ebi Ren, Noa in bɔypikin dɛn ɛn dɛn wɛf dɛn bɔn bɔku pikin dɛn. Dɛn famili gro ɛn dɛn bigin fɔ go na difrɛn pat dɛn na di wɔl, jɔs lɛk aw Jiova bin tɛl dɛn fɔ du.

Bɔt sɔm famili dɛn nɔ bin obe Jiova. Dɛn tɔk se: ‘Lɛ wi bil wan siti ɛn de de. Wi go mek wan tawa we go ay te rich na ɛvin. Da tɛm de, ɔlman go sabi wi.’

 Jiova nɔ bin gladi fɔ wetin dɛn pipul dɛn de bin de du, so i disayd fɔ stɔp dɛn. Yu no aw i du dat? Wɛl, i mek dɛn bigin tɔk difrɛn difrɛn langwej dɛn. Bikɔs dɛn nɔ bin de ɔndastand wetin dɛn de tɔk to dɛnsɛf, dat mek dɛn stɔp fɔ bil di tawa. Dɛn kam fɔ kɔl di siti we dɛn bin de bil Babɛl, we min “Kɔnfyushɔn.” Pipul dɛn bigin kɔmɔt de ɛn go liv ɔlsay na di wɔl. Bɔt dɛn bin kɔntinyu fɔ du bad tin dɛn na di nyu ples dɛn usay dɛn bin de liv. Yu tink se pipul dɛn bin de we stil lɛk Jiova? Wi go tɔk bɔt dat insay di nɛks lɛsin.