Ãlikin Ibwijleplep eo, ear lõñ nejin l̦õm̦aro nejin Noa im lim̦aro pãleer. Ear lõñl̦o̦k uwaan baam̦le ko aer, im rar jino aer ejjeplõklõk l̦o̦k ñan jikin ko jet ilo lal̦ in. Eñin kar men eo Jeova ear jiroñ er bwe ren kõm̦m̦ane.

Ak jet iaan baam̦le ko rar jab pokake Jeova. Rar ba: ‘Jen kalõk juon jikin kweilo̦k im pãd ie. Im jenaaj kõm̦m̦ane juon em̦ eutiej me enaaj tõpar lañ. Innem etad enaaj buñbuñ.’

 Jeova ear jab m̦õn̦õn̦õ kõn men in armej ro rar kõm̦m̦ane, kõn men in ear kabõjrak er. Kwõjel̦ã ke ewi wãween an kar kõm̦m̦ane men in? Ear kajju kõm̦m̦an bwe ren kõnono kajin ko reoktak jãn doon. Innem kõnke rar jab maroñ mel̦el̦e ta ko rej ba ñan doon, rar bõjrak jãn aer kõm̦m̦ane jerbal in ekkal eo. Eñin unin etan jikin kweilo̦k eo rar kalõke in Bebel, mel̦el̦ein “Pok.” Armej ro rar jino em̦m̦akũt jãn ijo im jokwe ilo aolepen pel̦aakin lal̦ in. Bõtab rar wõnm̦aanl̦o̦k wõt im kõm̦m̦ani men ko renana ilo jikin ko rekããl rar jokwe ie. Ekar ke wõr wõt armej me rar yokwe Jeova? Eokwe jenaaj lale ilo jebta eo tok juon.