Sa-kãsengã poore, a Nowe kom-dibli wã ne b pagbã roga kamb wʋsgo. B zakã nebã sõor ra paasdame, hal tɩ kẽer yik n tɩ me b zags dũniyã zĩis a taaba, wa a Zeova sẽn da yeel tɩ b maanã.

La neb kẽer pa sak a Zeova sẽn yeelã ye. B yeelame: ‘D ra sãeeg taab ye. Wa-y tɩ me tẽnga, n pa zĩ-yende. D me gasgo, t’a zãntlem tãag saasã, tɩ d yʋʋrã yi.’

 A Zeova sũur pa yɩ noog ne nin-kãensã sẽn da maandã ye. A yãka yam n na n sãam b tʋʋmdã. Fo mi a sẽn maan bɩ? A kɩtame tɩ ned kam fãa tiig n gomd buud-gomd a to. B sẽn da pa le wʋmd taab goamã yĩnga, b basa meebã. B wa n boonda tẽng ning b sẽn da metã tɩ Babɛll. Rat n yeelame tɩ “kalem-kalem.” Nebã sãeega taab dũniyã gill zugu. La baa b sẽn yik n tɩ beẽ wã, b ra ket n maanda sẽn pa sõma. La rẽ yĩnga, neb ra beeme n ket n nong a Zeova bɩ? D na n bãnga rẽ sak ning sẽn pʋgdã pʋgẽ.