Ka morago ga Meetsefula, barwa ba Noa le basadi ba bona ba ile ba ba le bana ba bantši. Malapa a bona a ile a gola gomme ba thoma go tlala lefase, go etša ge Jehofa a be a ba boditše gore ba dire bjalo.

Eupša ba bangwe ba be ba sa kwe Jehofa. Ba ile ba re: ‘Etlang re ikageleng motse gomme re duleng go wona. A re direng le tora yeo ntlha ya yona e fihlago legodimong. Ke moka re tla tuma mo lefaseng.’

 Jehofa o ile a galefišwa ke seo batho bao ba bego ba se dira, ke moka a dira gore ba tlogele seo ba se dirago. Na o a tseba gore o ile a dira seo bjang? O ile a dira gore ba thome go bolela maleme a go se swane. Ka morago ga moo, ba ile ba se sa kwešišana gomme ba tlogela go aga motse woo. Motse wo ba bego ba leka go o aga o ile wa bitšwa Babele, e lego leina leo le bolelago gore “Go raragana.” Batho bao ba ile ba thoma go tloga motseng woo gomme ba ya ba dula dinageng tše dingwe. Eupša ga se ba ka ba lesa go dira dilo tše mpe. Na go be go sa na le bao ba bego ba rata Jehofa? Re tla ithuta ka seo kgaolong e latelago.