Konyima Yombila Onene, ovana va Noe avakala novana ovanyingi. Ombunga yavo aikulu, avehimbika okuliyandyana kononthele mbelikalela mbo ohi, ngetyi Jeova evepopilile.

Mahi onombunga mbumwe kambetavelele ku Jeova. Ankho vati: ‘Tutungei epunda-umbo atukala vala kumwe. Tulingei ondyuo imwe yaya unene peulu. Opo tukale nomunkhima.’

 Jeova ehetyihande etyi ovanthu ovo ankho vekahi nokulinga iya atalameka ovilinga viavo. Utyii oityi alinga? Wapilulula omalusoke avo avahimbika okupopia omalaka elikalaila. Aveheliivi vali kese umwe na mukuavo, ovilinga viavo avitalama. Epunda-umbo ankho vekahi nokutunga aliihanwa okuti o Mbabele tyihangununa okuti “Onondyaya.” Pahe ovanthu avahimbika okuilukila kononthele ononkhuavo mbo ohi. Mahi vatuaileko okulinga ovipuka ovivi kovilongo oku vakakala. Okuti ankho kuna omunthu uhole Jeova? Matutyitale monthele mailandulako.