Jatun Manllanai Tamia jipaca, Noepa churicunaca paicunapa huarmihuanga tauca huahuacunatami charirca. Shinami paicunapa familia mirajpica Jehová mandashcashna shuj shuj pushtucunapi causangapaj rirca.

Shinapash huaquin familiacunaca Jehová Diosta na cazushpami cashna nirca: ‘Shuj pueblotapash, shuj torretapash rurashunchi. Chai torrepa umataca jahua pachaman chayajta rurashunchi’. ‘Shina rurashpa tucuicuna rijsishca tucushunchi’ nishpa.

 Chai gentecuna rurajujtaca Jehová Diosca na alicachircachu. Chaimandami ama shina rurashpa catichun jarcarca. ¿Imashina jarcashcata yachanguichu? Na yashcapimi shuj shuj shimicunapi gentecunataca parlachirca. Chaimandami paicunapura imata parlajushcata na intindishpa chai torretaca ñana rurashpa catirca. Gentecunaca chai llactataca Babel shutitami churarca. “Taita Dios tucui cai pachapi causajcunapa rimaita chaipi pandachishcamandami chashna shutichirca”. Shinami gentecunaca Babel llactamanda shuj llactacunaman causangapaj rirca. Shinapash maiman rishpapash paicunaca nalicunata rurashpami catirca. Quiquinga ¿imatata yuyapangui? ¿Pipash Jehová Diosta juyajca tiarcacha? Chaitaca cati capitulopimi yachajushun.