Пало Потоп, о чхаве е Ноескере хем ленгере ромња сине лен бут чхаве. О фамилие овена сине са побаре, хем почминѓе те живинен ко различна тхана ки Пхув, сар со вакерѓа ленге о Јехова.

Ама, несаве фамилие на шунена сине е Јехова. Ола вакерѓе: „Те кера аменге диз хем те ачхова акате. Ка кера добором бари кула со ка овел учи џи ко небо. Аѓаар ка шај те ова пенџарде машкар о мануша“.

 Ама, е Јеховаске на свиџинѓа пе адава со почминѓе те керен о мануша, адалеске чхинавѓа лен. Џанеа ли сар керѓа адава? Ов керѓа таро јекх пути о мануша те почминен те керен лафи ко различна чхибја. Адалеске со нашти сине те хаљовен пе машкар песте, ола чхинавѓе те керен и кула. И диз со почминѓе те керен ла сине пенџарди сар Вавел, со значинела „збрка“. О мануша почминѓе те џан песке адатхар хем те живинен ко јавера тхана ки цели Пхув. Ама, ола керена сине понадари да лошна буќа ко тхана коте со геле те живинен. Дали ки Пхув сине некој со мангела е Јехова? Башо адава ка дикха ко јавер поглавје.