Palo Potop, e Nojese čhave hem oljenge romnja hine ljen but čhave. Oljenge porodice ulje sa pobare hem počmindže te živinen ko različita thana ki phuv, sar so phendža ljendže o Jehova.

Ama, disave porodice na šundže e Jehova. On phendže: „Hajde te čera amendže diz hem te ačhova akate. Ka čera odobor bari kula so ka ovel uči dži ko nebo. Adžahar ka ova pendžarde maškar o manuša.“

 Ama, e Jehovase na sviđindža pe odova so počmindže te čeren o manuša, hem odoljese čhinavdža ljen. Džaneja li sar čerdža odova? Ov čerdža ando jekh puti o manuša te počminen te vačeren ko različita čhibja. Odoljese so naštindže te haljon pe maškaro peste, on čhinavdže te čeren i kula. I diz koja počmindže te čeren hine pendžardi sar Vavilon, so značini „zbrka“. O manuša počmindže te džan othar hem te živinen ko avera thana ki celo phuv. Ama, on hem ponodri čerdže lošna buča ko thana kaj dželje te živinen. Da li ki phuv hine neko ko manglja e Jehova? Ando odova ka dikha ki aver priča.