Liutiha Rai-Nabeen, Noé nia oan-mane sira no sira-nia feen iha oan barak. Sira-nia família sai boot, no sira komesa hela iha fatin oioin iha mundu, hanesan Jeová haruka sira atu halo.

Maibé família balu la halo tuir Jeová. Sira dehan: ‘Mai ita harii sidade ida no hela iha sidade neʼe. Ita sei harii uma aas ida neʼebé ninia tutun bele toʼo lalehan. Hodi halo hanesan neʼe, ita bele iha naran-boot.’

 Jeová la kontente ho buat neʼebé sira halo, tan neʼe nia deside atu hapara sira. Ó hatene ka lae, saida mak Jeová halo? Derrepente deʼit, nia halo sira koʼalia ba malu ho língua neʼebé la hanesan. Sira labele komprende malu tan, entaun sira para serbisu atu harii uma aas. Ikusmai, ema hanaran sidade neʼe Babel, liafuan neʼe katak “Konfuzaun”. Husi tempu neʼebá ema komesa hela namkari iha mundu tomak. Maibé sira kontinua halo buat aat oioin iha fatin foun neʼebé sira hela bá. Iha ka lae, ema ruma neʼebé nafatin hadomi Jeová? Ita sei hetan resposta iha istória tuirmai.