Shighe u Mngerem ma Deemee kar kera la, ônov mba Noa mba nomso mbara vea kasev vev mar ônov kpishi. Icombor ve seer ngeen, nahan ve hii u samber sha tar, vough er Yehova kaa ér ve er nahan.

Kpa icombor ve igen ungwan imo i Yehova ga. Ve kaa ér: ‘Se maa nen zege geri heen, se lu nen her. Se maa nen gôgôyou u taven sha, a tav je a za kighir sha kwavaôndo. Nahan iti yase i za gwa.’

 Kwagh u ior mbara lu eren la doo Yehova ga, nahan a cir tom ve la. U fa er yange cir tom shon kpa? Yehova musan ve zwa kwa môm, maa ve hingir u lamen ijô kposo kposo. Er ve kera fatyô u ungwan ijô i ior vev mbagenev lu lamen la ga yô, ve de tom u maan kwagh la. I va hingir u yilan zege geri u yange ve lu maan la ér Babel, inja na yô ér ‘anzughul.’ Tsô ior hii u samben yemen za lun sha ajiir kposo kposo sha tar. Kpa ve za hemen u eren aferakaa sha ajiir a ve za tema la. Nahan ior mba ungwan imo i Yehova shi ken ve je he? Se time ken ityough ki dondon kin tsô se fa.