L’ɔkɔngɔ wa Mvula k’elola, ana wa Nɔa la wadiɛwɔ wakote ana efula. Nkumbo yawɔ yakatahamaka ndo wakatatɛ diangana lo bɛtshi dia nkɛtɛ diotshikitanyi paka oko wakawatɛ Jehowa dia nsala.

Koko ase nkumbo amɔtshi kokitanyiya Jehowa. Vɔ wakate ɔnɛ: ‘Nyɛsɔ toke osomba kele todjasɛ lanɛ. Sho tayoka tshoto y’otale dia shɔdi yayɔ nkoma polo l’olongo. Lo nsala ngasɔ, mbayotonga anto wa lokumu.’

 Jehowa kɔngɛnangɛna kɛnɛ kakasalaka anto asɔ, diakɔ diele nde akɔshi yɛdikɔ ya memadia olimu ɔsɔ. Onde wɛ mbeyaka ngande wakandasale dui sɔ? La shashimoya, nde akaakonya lo vɔ ntɛkɛta ɛtɛkɛta wotshikitanyi. Lam’ele vɔ hawoyokoka mbokana lam’asawɔ, vɔ wakatshike nsala olimu ɔsɔ. Osomba wakawakaka, wakeyamaka oko Babɛlɛ, kitshimudi ate “ofukutanu.” Anto wakatatɛ pandjɔnɛ ndo wakatodjasɛ lo nkɛtɛ k’otondo. Koko, vɔ wakatetemala nsala akambo wa kɔlɔ l’ahole w’eyoyo wakawatodjasɛka. Ko onde ndooko onto lakatetemala mboka Jehowa ngandji? Tayokondja okadimwelo lo tshapita yayela.