Pamanyuma pa Chigumula, ŵana ŵa Nowa na ŵawoli ŵawo ŵakababa ŵana ŵanandi. Ŵanthu ŵakaŵa ŵanandi chomene ndipo ŵakamba kumbininikira pa charu chose chapasi. Ŵakachita umo Yehova wakaŵaphalilira.

Kweni ŵanthu ŵanyake ŵakapulikira yayi Yehova. Ŵakati: ‘Tiyeni tijizengere tawuni na kukhalamo. Tipange chigongwe chitali chakuti chikafike kuchanya ku mtambo. Ndipo tijipangire mbiri.’

 Yehova wakakondwa yayi na ivyo ŵanthu aŵa ŵakachitanga. Lekani wakaghanaghana vya kuŵalekeska. Kasi ukumanya icho Yehova wakachita? Wakatimbanizga chiyowoyero chawo. Ŵanthu ŵakamba kuyowoya viyowoyero vyakupambana. Chifukwa chakuti ŵakapulikananga yayi, ŵakaleka kuzenga. Zina la tawuni iyo ŵakazenganga likamba kuchemeka kuti Babeli. Zina ili likung’anamura ‘Kutimbanizgika.’ Ŵanthu ŵakamba kumbininikira pa charu chose chapasi. Kweni ŵakalutilira kuchita vinthu viheni kulikose uko ŵakalutanga. Kasi wakaŵapo munthu uyo wakalutilira kutemwa Yehova? Timumanyenge mu mutu 8.