Panyuma pa cigumula, ŵanace ŵa Nowa ŵala ŵaŵelece ŵanace ŵajinji. Maŵasa gawo gatupile mnope mwamti ŵatandite kutama malo gakulekanganalekangana pacilambo capasi mpela muŵasalile Yehofa.

Nambo maŵasa gane nganigampikanilaga Yehofa. Gatite, ‘Kwende tutaŵe msinda kuti tutamejemo. Citutaŵe sanja jelewu jakuti jikagunde kwinani. Kaneko cituŵe ŵakumanyika.’

Yehofa nganasangalalaga ni yaŵatendaga ŵanduwo ni ŵaganisisye yakulekasya masengo gawogo. Ana mkumanyilila  kuti ŵalekasisye mwamtuli? Jwalakwe ŵatendekasisye ŵanduwo kuti aŵeceteje yiŵeceto yakulekanganalekangana. Ligongo lyakuti nganapikanganaga, ŵalesile masengo gakutaŵago. Msinda waŵataŵagawo watandite kumanyika kuti Babele. Lina lyakuti Babele likusagopolela “Cisokonasyo.” Ŵandu ŵatandite kutyoka pamalopo ni kuja kutama kumalo gane. Nambo kulikose kuŵatamagako ŵatendagape yindu yakusakala. Nambo ana ŵapali ŵandu ŵane ŵaŵamnonyelaga Yehofa? Tucilijiganya yeleyi mu mtwe wakuyicisya.