PONJI MIR 8
Abraham giku Sara giworo dwand Mungu
Ceng’ini ku Babel, adhura moko bino nuti ma julwong’o Ur. Dhanu mir adhurane gibed giworo ngo Yehova ento gibed giworo mungu m’araga dupa. Re i adhurane, ng’atu moko nuti m’ubino woro Yehova kende. Nyinge bino Abraham.
Yehova uwacu ni Abraham kumae: ‘Wek ot peri ku jupewu, man icidh i ng’om ma abinyutho iri.’ Mungu udok ung’olo ire kumae: ‘Ibidoko thek ma dit, man abimio mugisa ni dhanu ceke mi ng’om ni kumi.’
Abraham ugam ung’eyo ngo nia Yehova ubeore kani, re ebino ku genogen i wie. E Abraham, Sara ma dhaku pare, won ma Tera, man Lot ma wod umin giworo dwand Mungu; gicoko ter migi man gicaku woth ma bor.
Abraham ubino ku oro 75 saa ma gitundo ku juruot pare i ng’om ma Yehova umito ginen. Nying’ ng’ombe bino Kanan. Kuca, Mungu uwok uweco i bang’ Abraham man eng’olo ire kumae: ‘Abimio ng’om maeni ceke m’ibeneno ni nyikweyi.’ Nwang’u Abraham giku Sara gidaru tii, man awiya migi de bino mbe. Dong’ Yehova ugam utimo ang’o kara lembe m’eng’olo ni Abraham utimere kakare?
‘Ni kum yioyic, Abraham uyio ecidh i ka m’ebijolo ni aba; man ecidho, m’eng’eyo ka m’ecidho i ie ngo.’—Juebrania 11:8
