Babel marka jakʼanjja, Ur sat mä markaw utjäna. Uka markankir jaqenakajj janiw Jehová Diosar adorapkänti, jan ukasti walja yaqha diosanakaruw adorapjjäna. Ukampis Ur markanjja, Abrahán sat mä chachaw Jehová Diosar adoräna.

Diosajj Abrahanar akham sänwa: ‘Utamatsa familiaranakamatsa jayar sarjjam, kawki lugartï uñachtʼaykäma ukaru’ sasa. Ukatsti akham sarakïnwa: ‘Mä jachʼa markaruw jumar tukuyäma. Juma taypiw taqe markanakas bendisitäpjjani’ sasa.

Kawkir khitañsa Jehová Diosajj munäna uk janis Abrahanajj yatkchïnjja, Diosar confiyasaw saräna. Abrahanasa, Sara esposapasa, Taré sat tatapasa, Lot sobrinopasa Diosaruw istʼapjjäna. Ukatwa cosasanakap wakichtʼasisajj wali jay viajipjjäna.

 Jehová Diosajj churämaw siskäna uka oraqer Abrahanampi familiapampi puripkäna ukhajja, Abrahanajj 75 maranïnwa. Uka lugarajj Canaán satänwa. Uka markanwa Jehová Diosajj Abrahanar akham sasin mä promesa luräna: ‘Taqe aka oraqwa wawanakamar churäjja’ sasa. Abrahanasa Sara esposapasa edadanëjjapjjänwa, janirakiw wawanïpkänsa. Ukhamajj ¿kunjamsa Jehová Diosajj uka promesap phoqani?