Klosap long Babel, i gat wan taon we nem blong hem Uru. Long ples ya, ol man oli wosipim plante giaman god. Be i gat wan man nomo long Uru we i wosipim Jehova, nem blong hem Ebraham.

Jehova i talem long Ebraham se: ‘Yu lego ples blong yu mo famle blong yu, yu go stap long wan kantri we bae mi soem long yu.’ Mo God i promes se: ‘Bae yu kam wan bigfala neson, mo bae yu kam olsem rod blong mi blong blesem plante man long olgeta ples long wol.’

Ebraham i no save ples ya we Jehova bambae i soemaot long hem, be hem i trastem Jehova. Ale Ebraham mo woman blong hem Sera, wetem papa blong hem Tera, mo Lot we i boe blong brata blong Ebraham, oli obei long Jehova. Oli fulumap olting blong olgeta mo oli stat blong wokbaot.

 Ebraham i gat 75 yia taem oli kamtru long kantri ya Kenan, we Jehova i soem long olgeta. Nao God i toktok bakegen long Ebraham, mo i promes se: ‘Olgeta graon ya we yu yu luk, bae mi givim long yu mo ol pikinini blong yu.’ Be Ebraham mo Sera tufala i olfala finis, mo tufala i no gat pikinini. ?Taswe, olsem wanem Jehova bambae i mekem promes ya i kamtru?