I de Nöchi vo Babel gits e Stadt, wo Ur heisst. D Mensche dört beted nid Jehova a, sondern vil anderi Götter. Aber es git en Maa in Ur, wo nur Jehova abetet. Er heisst Abraham.

Jehova seit em Abraham: «Gang vo dehei weg, weg vo dine Verwandte, in es Land, wo ich dir wird zeige.» Gott verspricht ihm: «Du wirsch zumene grosse Volk werde. Wil du eso en Glaube hesch, wird ich wunderbari Sache mache – für vil Mensche uf de ganze Erde.»

De Abraham weiss nid, wo ihn Jehova hiischickt. Aber wil er uf Jehova vertraut, folget er ihm. De Abraham, sini Frau d Sara, sin Papi, de Terach, und sin Neffe, de Lot, packed ihri Sache und mached sich uf di langi Reis.

Wo de Abraham und sini Familie schlussendlich i dem Land achömmed, isch er 75i. Das isch jetzt das Land, wo Jehova ihne wett zeige: Es heisst Kanaan. Dört redt Jehova mit em Abraham und verspricht ihm: «Das ganze Land, wo du da um dich ume gsehsch, wird ich dine Chind gee.» Aber de Abraham und d Sara sind scho alt und hend no gar kei Chind. Wie haltet Jehova jetzt sis Verspreche?