KUKWE JA TÖTIKARA 8
Abrahán aune Sara Ngöbö kukwei mikani täte
Babel ye ken bäsi, juta keteiti kädeka nämene Ur ye nämene. Kä yekänti nitre ñaka nämene Jehová mike täte, ñakare aune nämenentre ngöbö keta kabre ngwarbe mike täte. Akwa, ni iti nämene Ur abokän nämene Jehová mike täte, niara kädeka nämene Abrahán.
Jehová niebare Abrahán ie: ‘Ju aune mä mräkätre tuenmetre, tibike kä mike tuare mäi yekänti mä rika’. Ye bitikäre, Ngöbökwe käbämikani ie: ‘Mä rabai juta kri. Aune mä köböire, jondron kwin rabai nitre kä jökräbiti tibien yekwe’.
Abrahán ie ñaka nämene gare Jehová tö namani juain medente, akwa tö ngwani kwe ie. Abrahán, muko kwe Sara, rün kwe Taré aune nürä kwe Lot käkwe Ngöbö kukwei mikani täte. Ja mikani juto kwetre aune nikanintre mente.
Abrahán yebiti kä nämene 75 ye ngwane niara aune mräkätre kwe ye namani Jehovakwe kä mikani tuare ie yekänti. Kä ye kädeka nämene Canaán. Yete Jehová kukwe ne käbämikani ie: ‘Kä jökrä tuin mäi, se tikwe biain monsotre mäkwe ie’. Akwa, Abrahán aune Sara namanina umbre krubäte aune monso ñaka nämene kwetre. Aisete, ¿Jehová kukwe käbämikani se ñokänti rabadre nemen bare?
“Abraham [...] Ngöbö kukwei mikani täte [...], aisete kä biandre Ngöbökwe ie, ye känti nikani ñobtä ñan angwane tödekani Ngöböbti kwe. Mden kisete nämane nüne, ye känti kä mikaninkä kwe, bti rikadre mdente ñan nämane gare ie, akwa nikani” (Hebreos 11:8).
