UWUHRẸ AVỌ 8
Abraham avọ Sera A Yoẹme kẹ Ọghẹnẹ
Evaọ ẹwho jọ nọ a re se Ọr nọ ọ kẹle Bebẹl, ahwo buobu a jẹ gọ eghẹnẹ efa siọ Jihova ba. Rekọ u wo ọzae jọ evaọ ẹwho na nọ ọ jẹ gọ Jihova. Odẹ riẹ Abraham.
Jihova ọ tẹ ta kẹ Abraham nọ: ‘Nyasiọ uwou ra gbe imoni ra ba, re whọ nya kpohọ obonọ me ti dhesẹ kẹ owhẹ.’ Kẹsena Ọghẹnẹ ọ tẹ ya eyaa kẹe nọ: ‘Who ti zihe ruọ orẹwho ulogbo, yọ me ti ru eware iwoma kẹ ahwo buobu evaọ akpọ na fiki ra.’
Abraham ọ riẹ obonọ Jihova ọ ta kẹe nọ ọ nya ha, rekọ o fievahọ Jihova. Fikiere Abraham avọ aye riẹ Sera, Tera ọsẹ riẹ, gbe ọmọ oniọvo riẹ nọ a re se Lọt, a tẹ kwa eware rai, a je muhọ ẹnya.
Ikpe 75 Abraham ọ jọ okenọ ọyomariẹ avọ uviuwou riẹ a ro te obonọ Jihova ọ gwọlọ nọ a kwa nya na. A re se oria na Kenan. Ọghẹnẹ ọ tẹ jọ etẹe ta ẹme kẹ Abraham jẹ ya eyaa kẹe nọ: ‘Mẹ te rehọ otọ nana kpobi nọ whọ be ruẹ na kẹ emọ ra.’ Evaọ oke yena, yọ Abraham avọ Sera a who no, rekọ a wo ọmọ ọvuọvo ho. Kọ ẹvẹ Jihova o ti ro ru eyaa riẹ na gba?
“Fiki ẹrọwọ, . . . Abraham, o yoẹme ẹkwoma ekpohọ oria nọ ọ te rọ reuku; ọ nya dede nọ ọ riẹ obonọ o je kpohọ họ.”—Ahwo Hibru 11:8
Enana E Sae jẹ Were Owhẹ
IFOTO
Eme Ma rẹ Sai Wuhrẹ Mi Abraham?
Eware iwoma vẹ Abraham o ru kẹ amọfa? Rehọ ifoto nana re who se iku Ebaibol na.
EKADE EBAIBOL
Ekade Ebaibol Abraham
Wuhrẹ kpahe oware nọ a ro se Abraham ogbẹnyusu Jihova. Printi, biẹ lahwe, jẹ sẹro ekade Ebaibol nana.
EBAIBOL NA—OVUẸ VẸ O RIẸ EVA?
