တၢ်မၤလိ ၈
နီၢ်စၤရါဒီးစီၤအၤဘြၤဟၣ် ဒိကနၣ်ကစၢ်ယွၤအကလုၢ်
ဖဲဝ့ၢ်အူၢ်အပူၤန့ၣ် ပှၤဘူၣ်ထီၣ်ဘါထီၣ်ဝဲ ယွၤလၢအကမၣ်တဖၣ်လီၤ. ဘၣ်ဆၣ် ပှၤလၢ အဘူၣ်ထီၣ်ဘါထီၣ် ယဟိဝၤယွၤန့ၣ် အိၣ်ဝဲတဂၤလီၤ. ဒီးအမံၤမ့ၢ်ဝဲ စီၤအၤဘြၤဟၣ်လီၤ. ဝ့ၢ်အူၢ်န့ၣ် အိၣ်တယံၤဘၣ်ဒီး ဝ့ၢ်ဘၤဘ့းလးဘၣ်.
ယဟိဝၤယွၤတဲဘၣ်စီၤအၤဘြၤဟၣ်လၢ– ‘ဟးထီၣ်ကွံာ်လၢနဟံၣ်နဃီဒီး လၢနဘူးနတံၢ်တဖၣ် အအိၣ်ဒီး လဲၤဆူကီၢ်လၢ ယကဒုးနဲၣ်နၤန့ၣ်တက့ၢ်.’ ဝံၤဒီး ကစၢ်ယွၤအၢၣ်လီၤအီလီၤ စီၤအၤဘြၤဟၣ်လၢ– ‘နကကဲထီၣ်ပှၤကလုာ် ဖးဒိၣ်တကလုာ်ဒီး ယကဆိၣ်ဂ့ၤပှၤအါဂၤလၢအအိၣ်လၢ ဟီၣ်ခိၣ်ဒီဘ့ၣ်ခီဖျိလၢနၤလီၤ.’
စီၤအၤဘြၤဟၣ်ကဘၣ်လဲၤလၢ ထံကီၢ်ဖဲလဲၣ်တဘ့ၣ်လဲၣ်န့ၣ် အဝဲတသ့ၣ်ညါဝဲဘၣ်. ဘၣ်ဆၣ် အဝဲနာ်န့ၢ် ယဟိဝၤယွၤလီၤ. လၢတၢ်န့ၣ်အဃိ စီၤအၤဘြၤဟၣ်, အမါနီၢ်စၤရါ, အပၢ်စီၤတ့ရၤဒီး အဖိဒိၣ်ခွါစီၤလိာ် ဒိကနၣ်ကစၢ်ယွၤအကလုၢ် ဒီးဘိၣ်ထီၣ်အတၢ်ဖိတၢ်လံၤ ဒီးစးထီၣ်လဲၤတၢ်လီၤ.
အတၢ်အၢၣ်လီၤအီလီၤအံၤ ကဟဲလၢထီၣ်ပှဲၤထီၣ်ဝဲဒ်လဲၣ်.
ဖဲစီၤအၤဘြၤဟၣ်အသးနံၣ်အိၣ်ဝဲ ၇၅ နံၣ်အခါ အဝဲဒီးအဟံၣ်ဖိဃီဖိလဲၤတုၤဝဲဆူ ထံကီၢ်လၢ ယဟိဝၤယွၤအဲၣ်ဒိးဒုးနဲၣ်အီၤန့ၣ်လီၤ. ထံကီၢ်အဝဲန့ၣ် တၢ်ကိးအမံၤလၢ ကီၢ်ကနၤဧၣ်လီၤ. ဖဲန့ၣ်န့ၣ် ကစၢ်ယွၤတဲတၢ်ဒီး စီၤအၤဘြၤဟၣ်ဒီး မၤဝဲတၢ်အၢၣ်လီၤအီလီၤဒီးအီၤလီၤ. ကစၢ်ယွၤတဲဝဲလၢ– ‘ထံကီၢ်လၢ နထံၣ်အီၤအံၤန့ၣ် ယကဟ့ၣ်လီၤနဖိနလံၤလီၤ.’ ဘၣ်ဆၣ် နီၢ်စၤရါဒီးစီၤအၤဘြၤဟၣ် အဖိတအိၣ်နီတဂၤဒံးဘၣ် ဒီးအဝဲသ့ၣ်သးပှၢ်ထီၣ်ဝဲဖးဒိၣ်လံ. လၢတၢ်န့ၣ်အဃိ ယဟိဝၤယွၤ“လၢတၢ်နာ်စီၤအၤဘြၤဟၣ် . . . ဒိကနၣ်ဝဲ ဒ်သိး အကဟးထီၣ်ဆူ အလီၢ်လၢ အကန့ၢ်ဘၣ်သါ, ဒီးလဲၤဆူလဲၣ်ဆူလဲၣ်န့ၣ် တသ့ၣ်ညါဘၣ်နာ်သက့ဒီး, ဟးထီၣ်ကွံာ်ဝဲလီၤ.”—ဧ့ၤဘြံၤ ၁၁:၈