Lukufi ye Babele, vakala ye mbanza yayikilwanga vo Ure. O nkangu a mbanza yayi nzambi zayingi basambilanga vana fulu kia sambila Yave. Kansi, muna mbanza Ure mwakala yo muntu ona wasambilanga kaka Yave. E nkumbu andi Abarayama.

Yave wavovesa Abarayama vo: ‘Katuka mu nzo aku yo sisa yitu yaku, wenda kuna nsi ina ikusonga.’ Nzambi wansia nsilu vo: ‘ E kanda diaku dikituka se zula kiampwena. O wantu ova nza yawonso besambulwa mu kuma kiaku.’

Abarayama kazaya ko e fulu kina Yave kantumanga. Kansi, walemvoka yo bunda e vuvu muna Yave. Muna kuma kiaki, Abarayama yo nkaz’andi Sara, Tera wa se diandi, yo Loti wa  mwan’andi ankazi banata e lekwa yau yo vanga nkangalu wandá.

Abarayama kimbuta kia mvu 75 kakala vava kalwaka ye esi nzo andi kuna nsi ina Yave kazola kubasonga. E nsi yayi yayikilwanga vo Kenani. I kuna Yave kasila nsilu kwa Abarayama vo: ‘Kuna kwa wana ye atekelo aku mvana e nsi yayi.’ Kansi Abarayama yo Sara se anunu bakala, ke bawutanga ko. Aweyi Yave kelungisila nsilu andi?