Bukaufi ni muleneñi wa Babele, nekunani muleneñi wa Ure, ili mo batu nebalapela milimu yemiñata kufita Jehova. Kono mwa muleneñi wa Ure, nekunani muuna yomuñwi yanaalapela feela Jehova. Libizo lahae neli Abrahama.

Jehova ali ku Abrahama: ‘Uzwe mwa naha yahenu ni ku bahabo wena, mi uye kwa naha yenika kubonisa.’ Mi Mulimu amusepisa kuli: ‘Ukaba sicaba sesituna mi nikaezeza batu babañata lika zende mwa lifasi kaufela kabakala hao.’

Abrahama naasazibi kwanaa muluma Jehova, kono naamusepile. Kacwalo Abrahama, musalaa hae Sara, Tera ndatahe, ni Lota mwanaa muhulwanaa hae bautwa taelo ya Jehova mi balonga libyana zabona ni kutama musipili omutelele hahulu.

 Abrahama naanani lilimo ze 75 yena ni lubasi lwahae hane bafitile mwa naha yanaabata Jehova kuli babone. Naha yeo neibizwa kuli naha ya Kanana. Hane bali mwa sibaka seo, Mulimu ambola ni Abrahama mi amusepisa kuli: ‘Naha ye kaufela yeubona, nikaifa bana bahao.’ Kono Abrahama ni Sara nebasupezi mi nebasina bana. Kacwalo, Jehova naakataleleza cwañi sepiso yahae?