Musumba wa Babeli wali umupiipi nu kwayelile umusumba wa Uli, uno antu aingi aikalangamo yapepanga ya leza aingi kucila ukupepa Yeova. Lelo umu Uli mwali umuntu umwi uwapepanga sile Yeova. Izina lyakwe wali a Abulahamu.

Yeova wanenyile Abulahamu ati: ‘Usye ing’anda yako na ya lupwa yako, alino uye uku mpanga ino namakulanga. Lyene Leza wamulavile ati: ‘Aa mumupanda wako, yalavula yaye umutundu ukalamba, nupya ndacitila antu aingi ivisuma pa mulandu wako.’

Abulahamu atamanyile kuno Yeova wamunenyile ukuti aye, lelo wataile Yeova. Fwandi Abulahamu, Sala umuci wakwe, isi Tela, na Loti umwipwa wakwe, yaipekinye iyatandika nu ulendo utali.

 Abulahamu wali ni myaka 75 lino wene nu ulupwa lwakwe yafisile umu mpanga ino Yeova wayanenyile ukuti yakalole. Impanga iyo yayamanga ukuti Kenani. Lino yali uku mpanga iya Leza wavwanzile na Abulahamu nu kumulaya ati: ‘Yii ali mpanga ino ndapeela ana yako.’ Nomba pa nsita iya ala Abulahamu na Sala aakote nupya ala yataakwatapo nu mwana ali wensi. Uzye Yeova wali nu kufikilizya uli ulayo uu?