LECCIÓN 8
Ta̱ Abrahán xíʼin ñá Sara ka̱ndíxana Ndióxi̱
Yatin chí ñuu Babel ni̱xi̱yo inka ñuu ña̱ xi̱naní Ur. Na̱ yiví na̱ xi̱ndoo kán va̱ása níkeʼéna ña̱ kúni̱ Jehová chi xi̱ndasakáʼnuna ku̱a̱ʼání ndióxi̱. Soo ni̱xi̱yo iin ta̱a ta̱ xi̱ndasakáʼnu Jehová, ta̱ xi̱naníra Abrahán.
Jehová ni̱ka̱ʼa̱nra xíʼin ta̱ Abrahán: “Sandákoo veʼún xíʼin na̱ táʼún ta kúaʼan inka ñuu”. Ta ña̱yóʼo ni̱ka̱ʼa̱n Ndióxi̱ taxira ndaʼa̱ra: “Ku̱a̱ʼání koo na̱ se̱ʼún. Ta ku̱a̱ʼání na̱ yiví ndakiʼin ña̱ va̱ʼa xa̱ʼa ña̱ keʼún”.
Va̱ása níkuda̱a̱-ini ta̱ Abrahán míí ku̱ʼu̱nra soo ka̱ndíxavara Jehová. Ta̱ Abrahán xíʼin ñá Sara, yivára ta̱ Taré xíʼin ta̱ Lot xa̱xi̱nra ka̱ndíxana Ndióxi̱. Nda̱saviína ña̱ʼa ña̱ kúúmiína ta ke̱ena ku̱a̱ʼa̱nna.
75 ku̱i̱ya̱ ta̱ Abrahán tá ni̱xa̱a̱na nu̱ú ñuʼú ña̱ ni̱ka̱ʼa̱n Jehová xíʼinra taxira ndaʼa̱ra. Ña̱yóʼo xi̱naníña Canaán. Yóʼo kúú nu̱ú ni̱ka̱ʼa̱n Jehová xíʼinra: “Ña̱yóʼo kúú ñuʼú ña̱ taxii̱ ndaʼa̱ na̱ se̱ʼún”. Soo ta̱ Abrahán xíʼin ñá Sara xa̱a̱ ku̱chéevana ta va̱ása kívika koo se̱ʼena. ¿Ndáa ki̱ʼva saxínu Jehová ña̱ ni̱ka̱ʼa̱nra xíʼin ta̱ Abrahán?
“Xa̱ʼa ña̱ ka̱ndíxaní ta̱ Abrahán Ndióxi̱ [...] ke̱era ku̱a̱ʼa̱nra nu̱ú ñuʼú ña̱ ni̱ka̱ʼa̱nra taxira ndaʼa̱ra, ni kǒo xíni̱ra nu̱ú ku̱a̱ʼa̱nra” (Hebreos 11:8).
