FAMAHAʼÖ 8
Aberahamo ba Sara, Laʼoʼö Niwaʼö Lowalangi
Lö aröu moroi ba Mbabeli, so mbanua sotöi Uri. Niha sato ba daʼö, lafosumange lowalangi faya tenga Yehowa. Hizaʼi, so ndra matua ba Guri, ha Yehowa nifosumangenia. Töinia Aberahamo.
Imane Yehowa khö Gaberahamo, ’Röi nomomö awö dalifusöu, ba aeʼe ba danö niwaʼögu khöu.’ Aefa daʼö, fawuʼu li Lowalangi, ’Ba tobali ndraʼugö soi sebua dania, ba börö me lö faröi ndraʼugö, andrö wa oya ufalua zi sökhi ba niha gulidanö.’
Lö iʼila Aberahamo hezo ifatenge ia Yehowa, hizaʼi faduhu manö dödönia khö Yehowa. Börö daʼö, Aberahamo hegöi foʼomonia Sara, amania Tara, ba ono mbeneʼönia sotöi Loti, lafaʼanö gama-gamara ba labörögö wofanö simane niwaʼö Yehowa.
No 75 fakhe ndröfi Gaberahamo me irugi danö somasi iforomaʼö khönia Yehowa si fao ösi nomonia. Töinia Kanaʼana. Ba daʼö fahuhuo Lowalangi khö Gaberahamo ba ilau fawuʼu li, ’Fefu danö niʼilamö andre, ba ubeʼe ba ndraonou.’ Hizaʼi, no atua Gaberahamo hegöi Sara ba lö hadöi onora. Börö daʼö, hewisa wamalua Yehowa zi no ifabuʼu?
”Börö wamati wa moloʼö Gaberahamo me ikaoni ia Lowalangi, möi ia ba danö nitehe khönia si tobali ondröita. Mofanö ia hewaʼae lö aboto ba dödönia hezo isawa.”—Heberaiʼo 11:8
Te Göi Adöni Dödöu
SURA NI’AMONI’Ö—HADIA NÖSINIA?
Fawu’u Li Lowalangi khö Gaberahamo
Hadia mbörö wa isawa danö Gana’ana Aberahamo? Hadia nifabu’u Yehowa khö Gaberahamo?
