Béíbel bíighahgi łaʼ kin haalʼá, éí Er hoolyé. Ákweʼé diné ląʼí diyin ałʼąą ádaatʼéego yichʼįʼ ndahałá, ndi Jiihóvah éí dooda. Ákondi Ergi tʼááłaʼí diné léiʼ Jiihóvah tʼéiyá yichʼįʼ hodísin. Éí Éíbraham wolyé.

Jiihóvah éí Éíbraham ííłní: ‘Nikéyah, bitsʼą́ąjįʼ dah diinééh, áádóó kéyah nił ííshją́ą́ ádeeshłíłíjįʼ díínééł.’ God díí yee hachʼįʼ ádee haadzííʼ: ‘Nitsʼą́ą́dóó diné tʼóó ahayói doo, ninahjįʼ nihookááʼ dineʼé bikʼí hodeeshdliił.’

Éíbraham éí Jiihóvah abííłʼaʼgóó doo bił bééhózin da, ndi Jiihóvah yaʼólíí ńtʼééʼ. Éíbraham, beʼasdzą́ą́ Sárah, bizhéʼé Tíírah, áádóó bidáʼí Lat yił hééł ádaʼjiilaago dashdiiná.

 Éíbraham éí 75 honááhaigo, Jiihóvah kéyahgóó díínééł hodííniid yę́ęgi jíkai. Éí kéyahígíí, Kéínan hoolyé. Ákweʼé God, Éíbraham díí yee yichʼįʼ ádee hadoodzíiʼgo ání: ‘Naʼáłchíní náás nootʼı̨́ı̨́łgóó díí kéyah tʼáá ałtso baa dideeshʼááł.’ Éíbraham dóó Sárah éí haastih índa baʼáłchíní ádin. Áko haitʼéego Jiihóvah yee ádee hadoodzííʼ yę́ę łaʼ doonííł?