Popepi no Mbabele ankho pena epundaumbo litiwa o Ur, ovanthu ankho vakalamo vafenda ovikahuku kavafende Jeova. Mahi mo Ur ankho muna omulume wike vala ufenda Jeova. Enyina liae o Abraiau.

Jeova apopila Abraiau okuti: ‘Sapo eumbo liove nombunga yove enda no kotyilongo mandyikulekesa.’ Konyima Huku emulae okuti: ‘Muove mamutundu elongo enene, iya mankhalingila ovanthu vovilongo aviho mavakamona ovipuka oviwa mokonda yove.’

Abraiau ankho kei oku Jeova memutumu, mahi ankho uyumba onthumbi mu Jeova. No ngotyo Abraiau no mukai wae Sara na tate yae Tera no nomuingona wae Lote avatyindi ovipuka viavo avahimbika okulinga oungendi.

 Abraiau ankho una omanima 75 puetyi vehika kotyilongo Jeova ankho ahanda okuvelekesa. Otyilongo otyo ankho tyitiwa o Kanaa. Huku wapopia na Abraiau iya alingi omulao ou: ‘Otyilongo etyi atyiho mandyityavela ovana vove.’ Mahi Abraiau na Sara ankho vakulupa iya vetupu omona nawike. Mahi oñgeni Jeova mafuisapo etyi alaa?