Haihi na Babeeli hakaba hariho Orurembo orurikwetwa Uri kandi abantu baayo bakaba nibaramya baaruhanga baingi atari Yehova. Kwonka omuri Uri hakaba harimu omushaija owaabaire naaramya Yehova wenka. Eiziina rye akaba ari Abrahamu.

Yehova akagambira Abrahamu ati: ‘Ruga omuri Uri n’omu banyabuzaare baawe, oze omu nsi ei ndikworeka.’ Reero Ruhanga akamuraganisa ati: ‘Noija kuba ishe w’amahanga g’abantu baingi kandi niinyija kukukorera ebirungi, abantu b’omu nsi yoona baheebwe omugisha ahabwawe.’

Abrahamu akaba atarikumanya ei Yehova yaabaire naamutwara, kwonka akamwesiga. N’ahabw’ekyo Abrahamu,  omukazi we Saara, ishe Teera, na mwihwa we Looti bakakoma ebintu byabo baayorobera Yehova kandi baatandika orugyendo ruraingwa.

Abrahamu akaba aine emyaka 75 obu we n’eka ye baahika omu nsi ei Yehova yaabaire naayenda ngu baaturemu. Ensi egyo ekaba neeyetwa Kanaani. Ku baabaire bariyo, Ruhanga akaraganisa Abrahamu ati: ‘Ensi egi ndyagiha abaana baawe.’ Kwonka Abrahamu na Saara bakaba bakuzire kandi bataine baana. Mbwenu shi Yehova akaba naabaasa kuhikiiriza ata okuraganisa kwe?