Suakpole Yule nee Babɛle avinli andwe biala yɛɛ menli mɔɔ bɛwɔ ɛkɛ la sonle awozonle ngakyile. Noko ɛnee nrenyia bie wɔ Yule mɔɔ sonle Gyihova a. Bɛfɛlɛ ye Ebileham.

Gyihova zele Ebileham kɛ: “Ye ɛ nwo fi ɛ ze sua nu nee ɛ nwo amra avinli, na kɔ azɛlɛ ne mɔɔ mebahile wɔ la azo.” Akee Nyamenle bɔle ye ɛwɔkɛ kɛ: ‘Ɛ bo zo amra badɛlɛ ayɛ maanle kpole, na ɔlua ɛ nwo zo mebayila maanle maanle kɔsɔɔti mɔɔ wɔ ewiade la.’

Ɛnee Ebileham ɛnze ɛleka mɔɔ Gyihova se ɔhɔ la, noko ɛnee ɔlɛ ye nu anwodozo. Yemɔti Ebileham, ɔ ye Sɛla, ye papa Tilaa nee ye awozoa Lɔɔto boɔboale bɛ nwo na bɛbɔle bɛ adendulɛ ne abo.

Mɔɔ Ebileham nee ye abusua ne dwule azɛlɛ ne mɔɔ Gyihova hilele bɛ azo la, ɛnee yeli ɛvolɛ 75. Bɛfɛlɛ ɛkɛ ne Keena. Ɛkɛ ne, Nyamenle  bɔle Ebileham ɛwɔkɛ kɛ: “Mebava azɛlɛ ɛhye meamaa ɛ bo zo amra.” Noko ɛnee Ebileham nee Sɛla ɛyɛ mrelera yɛɛ bɛtɛwole. Yemɔti ɛnee kɛ ɔkɛyɛ na Gyihova amaa ye ɛwɔkɛ ne ara nu ɛ?