Naqaj che Babel kʼo chi jun tinamit, ubʼiʼ Ur. Chilaʼ ri winaq kkiqʼijilaj ta ri Jehová, are kekiqʼijilaj ri e tyox. Are kʼu kʼo jun achi che kuqʼijilaj ri Jehová, ubʼiʼ Abrahán.

Jehová xubʼij che Abrahán: «Chayaʼ kan ri awachoch xuqujeʼ ri afamiliares tekʼuriʼ katbʼe pa jun lugar che kinkʼut chawach». Tekʼuriʼ ri Dios xutzujuj che: «Katux na jun nimalaj tinamit. Xuqujeʼ awumal at, kinbʼan na utz taq jastaq chke ri winaq rech ronojel ri uwach Ulew».

Abrahán retaʼm ta jachiʼ kraj ri Jehová kutaq bʼik, are kʼu kukubʼsaj ukʼuʼx chrij. Abrahán; ri rixoqil, Sara; ri utat, Taré, xuqujeʼ ri usobrino Lot xkinimaj ri Dios. Xkil ri jastaq ke kkikʼam bʼik xuqujeʼ xkimaj bʼi ri nimalaj bʼe.

 Abrahán kʼo 75 ujunabʼ are chiʼ areʼ xuqujeʼ ri ufamilia xeʼopan pa ri ulew che ri Jehová xuya chke. Ri tinamit ubʼiʼ Canaán. Chilaʼ, ri Jehová xubʼan wajun tzujunik riʼ che: «Ronojel ri ulew che kawilo, kinya chke ri awalkʼwal». Are kʼu ri Abrahán xuqujeʼ Sara nim chi kijunabʼ xuqujeʼ kʼot kalkʼwal. Rumal laʼ, ¿jas kubʼan ri Jehová che ubʼanik ri xutzujuj chke?