NSOLO 8
Abhrahamu na Sara Abvera Mulungu
Cifupi na Bhabheli, kukhali nzinda unango ukhacemerwa Uri. Anthu a kweneko akhalambira alungu azinji mbuto mwakulambira Yahova. Mbwenye ku Uri kukhali na mamuna unango akhalambira Yahova basi. Mamuna unoyu dzinace ndi Abhrahamu.
Yahova apanga Abhrahamu: “Siya dziko yako, siya mbumba yako na nyumba ya babako; ndoko ku dziko inadzakupangiza ine.” Buluka penepo, Mulungu apikira: ‘Ndinadzakucita mbumba ikulu, ndinadzapasa anthu onsene pinthu pyadidi thangwi yako.’
Abhrahamu nee akhadziwa mbuto idatumwa iye na Yahova toera kuenda. Mbwenye iye anyindira Yahova. Natenepa, Abhrahamu na nkazi wace, Sara, pabodzi na baba wa Abhrahamu akhacemerwa Tera na ndzukulu wace Loti, apaka mitolo yawo mbabvera mu kucita ulendo wakulapha.
Abhrahamu akhali na pyaka 75 mudafika iye na banjace ku dziko idapangwa iwo na Yahova. Dziko ineyi ikhacemerwa Kanani. Mulungu alonga na Abhrahamu mbacita pikiro iyi: ‘Ndinadzapereka dziko ino kuli ana ako.’ Mbwenye Abhrahamu na Sara akhadakalamba, pontho nee akhali na mwana. Mphapo, Yahova mbadacitanji toera kukwanirisa pikiro ineyi?
‘Thangwi ya cikhulupiro, Abhrahamu atawira kuenda ku dziko ikhafuna kupaswa iye, mbafuluka, nee kudziwa kukhaenda iye.’—Ahebere 11:8
