Mbeni gbata ayeke dä so ayo na gbata ti Babel ape, a iri ni Ur. Na ndo ni so, azo ni avoro gbâ ti anzapa ahon ti voro Jéhovah. Me, a yeke wara na yâ ti gbata ti Ur so mbeni koli so avoro ti lo gï Jéhovah. Iri ti lo ayeke Abraham.

Jéhovah atene na Abraham: ‘Mo zia kodro ti mo, afami ti mo nga mo gue na kodro so mbi yeke fa ni ande na mo.’ Na pekoni, Nzapa atene: ‘Mo yeke ga ande mbeni kota mara, nga ndali ti mo mbi yeke iri ande tënë nzoni na ndö ti gbâ ti azo so ayeke na ndö ti sese kue.’

Abraham ahinga pëpe ndo so Jéhovah atene na lo ti gue dä, me lo sara confiance na Jéhovah. Tongaso, Abraham, wali ti lo Sara, babâ ti lo Térah nga na Lot so ayeke molenge ti ita  ti lo, aleke aye ti ala nga ala mä yanga ala komanse ti sara yongoro voyage ni.

Abraham ayeke na ngu 75 na ngoi so lo na afami ti lo asi na kodro so Jéhovah aye ti tene ala bâ. Iri ti kodro ni ayeke Canaan. Ge, Nzapa asara tënë na Abraham nga lo mû zendo so: ‘Kodro so kue mo bâ angoro mo so, mbi yeke mû ande ni na amolenge ti mo.’ Me, Abraham na Sara aga mbakoro awe nga ala yeke na molenge ape. Tongaso, tongana nyen la Jéhovah ayeke sara si zendo ti lo so aga tâ tënë?