SIFUNDVO 8
Abrahama NaSara Balalela Nkulunkulu
Edvute naseBhabhele bekunelidolobha lebelibitwa ngekutsi yi-Uri. Bantfu base-Uri bebakhonta bonkulunkulu bemanga kunekutsi bakhonte Jehova. Nanobe kunjalo, bekunendvodza lebeyikhonta Jehova kuphela, ligama layo bekungu-Abrahama.
Jehova watsi ku-Abrahama: ‘Suka eveni lakini, etihlotjeni takho nasendlini yababe wakho, uye eveni lengitakukhombisa lona.’ Nkulunkulu wase uyametsembisa utsi: ‘Ngitawukwenta ube sive lesikhulu, futsi utawuba sibusiso kulabanye. Tonkhe tive letisemhlabeni titawubusiswa ngawe.’
Abrahama abengayati lendzawo Jehova labemtfuma kuyo, kodvwa wetsemba Jehova. Ngako-ke Abrahama, nemfati wakhe Sara, nababe wakhe Thera kanye naLoti umntfwana wabhuti wakhe batilungiselela loluhambo loludze base bayahamba.
Abrahama bekaneminyaka lengu-75 ngesikhatsi yena nemndeni wakhe befika kulelive Jehova abebatsembise lona. Lelive belibitwa ngekutsi yiKhenani. Kulapho Nkulunkulu akhuluma khona na-Abrahama futsi wenta nasi setsembiso: ‘Lonkhe lelive ngitalinika situkulwane sakho.’ Bo-Abrahama naSara besebabadzala kakhulu futsi bete bantfwana. Bekutawenteka njani loku lobekutsenjiswe nguJehova?
“Ngekukholwa, Abrahama watsi nakabitwa walalela ngekutsi aphume aye endzaweni labetawunikwa yona njengelifa; waphuma nanobe abengati kutsi uyaphi.”—Hebheru 11:8
Lokunye Longatsandza Kukuhlola
LiBhayibheli—Ngumuphi Umlayeto Leliwucuketse?
Nkulunkulu Wenta Sivumelwane Na-Abrahama
Watfutselani Abrahama eKhenani? Ngusiphi sivumelwane Jehova lasenta na-Abrahama?
