Maraning Babelẹ̌, piạ soa arenge Ur. Taumata sene měnẹ̌němbah manga dewa, bal᷊inẹ měnẹ̌němbah si Yehuwa. Katewe, sene piạ sěngkatau esẹ měnẹ̌němbah si Yehuwa. Arenge Abraham.

Yehuwa naul᷊ị si Abraham, ’Těntangke wal᷊enu dingangu anạu sěngkataunu, kụ pěngal᷊ingke sarang tampạ Takụ todẹkang si kau.’ Bọu ene Mawu nẹ̌diandi, ’I kau sarung makoạ bangsa gěguwạ. Kụ ual᷊ingu i kau masatia, Iạ sarung měkoạ lawọ barang mapia gunang kěbị taumata su patikụ dunia.’

Abraham běga i sie sarung makoạ sarang apa, katewe i sie mangimang si Yehuwa. Hakị u ene i Abraham, kawinge i Sara,  papạe i Terah, dingangi Lot keponakan i Abraham, něnadia barang-barang kụ něnětạ liměngang marau, kere seng niparentang i Yehuwa.

Abraham umure 75 su taunge su tempong i sie dingangu kěluargane nahumpạ su tampạ nitěbọ i Yehuwa. Tampạ ene isẹ̌sěbạ Kanaan. Ndaị sene, Mawu nẹ̌diandi si Abraham, ’Kěbị ěntana nikasilonu ini sarung Takụ onggọtang su manga anạu.’ Katewe, i Abraham dingangi Sara seng maghurang dingangu tawẹ apa anạ. Mạeng kerene, kerea Yehuwa sarung měkoạ apa seng niriandi-Ne?